Mahama dey go Central Region again after the chao times wey e go there this year.
Mahama e tour go be two days as e dey try get some last minute vim for there. That place, the way dem dey vote, sometimes e be someway; dem fe to change dema mind rough rough so the parties all make wild say dem too no go dull.
E be just last week wey wanna Vice President Amissah Arthur go there; he spend like five days.
Mahama go take advantage of the tour then commission eight community day schools then other things wey e government dey do for there.
Wanna President go hold rallies, too, as e dey there.
Ghana go vote on December 7. So far, as things dey go, e check like e bi only Mahama then NPP dema Akufo-Addo wey people dey talk say dem go get chao votes.
As dem jie Akua Donkor then Ayariga dems for the Presidential inside, people dey talk say e check like now the thing come turn serious business.