Biggie Sparta, Shatta Wale e bodyguard wey receive the tornado slap for stadium last Saturday say make people mind demma own business.
Today, for Shatta Wale e Facebook Live top, the bodyguard say people never go barb how tins dey go on for the SM Empire: “you’ll never understand, unless you come to the empire”, before he continue talk say make atanfo shut orp demma moff.
For the video inside, Biggie san talk say, Shatta Movement deɛ, unless six feet.
Plenty people say Shatta Wale no force, say the slap no need. But Shatta come defend the matter, say de tin all be “stunt”, wey nobody go barb the “SM Code”.
Saturday dawn, as Shatta Wale dey perform for Starr FM demma annual S Concert for Accra Sports Stadium, some fan climb the stage go hold am. The tin bore Shatta say Sparta dey der wey he make something so happen. Because if like the fan want do am sometin, like he do am. E mean say, Sparta no do e job, so he for chop slap. Shatta slap guy man make e mask sɛf comot.
The 2017 S Concert, ebi Storm Energy Drink, Accra City Hotel, Express Savings and Loans, Ghana Post GPS, Hubtel, den Cosmopolitan Health Insurance wey sponsor am, wey artists like Joyce Blessing, Gifty Osei, rapper Obibini, A.I, B4Bonah, Kumi Guitar, King Jerry, Bukom Banku, Captain Planet, Edem, Stonebwoy, Fancy Gadam, den Ras Kuuku dems all perform.