Chale Wote— ACCRA [dot] ALT demma annual street festival wey e dey happen for Jamestown — Accra, come off from August 20 —26, wey papping mome deɛ epap waa — so so colourful styles and jammings.
The 6-day marathon wey attract thousands upon thousands nu, art fairs, workshops, a masquerade jam, film screenings, den musical concerts, all come inside. Exhibitions from over 200 Ghana-based den international artists come on for 10 locations for the John Evans Attah – Mills High Street der.
The 8th edition, this year, we get wanna president, H.E Nana Addo Danquah Akufo Addo, as special guest of honour. Minister of Tourism, Arts and Culture, Hon. Catherine Afeku also pass through. E ministry support the programme plus GHc300,000 for one two one two.
The theme for Chale Wote 2018 be “Para-Other.” What edey mean? This be how organisers explain am: “Para-Other be phenomena, e be tin we go fi use take change how yaanom do tins wey we no dey fi move. E be mind tin. E dey like shortwave radio wey we go fi take travel anywhere. Para-Other check like some state wey we no sheda be human – we turn som oda tin. We dey use am link Black pipol for every corna for dis earth. E be some code, e san be sound we no hear before but e dey here already. Para-Other be new way to think den open space wey wana humanity evolve pass ein current state. Para-Other be deh place we wan link oda Black People for earth, so say we go fi create wanna own world. Para-Other be key, you for find your own.”
ENEWS photoo, Eben Yanks kot some killer pics. Feel am: